Quen Somos – Granxa Curiscada

Quen
Somos

Granxa A Curiscada

Curiscada, é unha granxa gandeira, familiar e ecolóxica. Curiscada ¡é o meu fogar! O nome débello ao propio lugar no que está situada: un lugar máxico, preto do camiño de Santiago e pertencente á parroquia de Burres (Concello de Arzúa).

A escasos metros da granxa dispoño dunha casa de turismo rural, o que xustifica aínda máis se cabe a miña atracción pola terra, polo entorno, polos animais. E oxalá esta paixón polo noso e polo traballo ben feito a poida transmitir de xeración en xeración, pois orgullosa estou de ser labrega e orgullosa estou de ser galega.

O meu obxectivo

Establecer un método de produción responsable que respecte ao máximo o medio ambiente, que loite polo benestar animal e que manteña e coide a biodiversidade do entorno natural.

Só con este sistema conseguirei obter unha materia prima san e de excelente calidade que alcance no mercado económico resultados positivos cos que seguir vivindo dignamente no rural galego.

Un pouco de historia

A granxa que rexento na actualidade foi creada nos anos 60 polos meus proxenitores mais un destino caprichoso púxoa nas miñas mans no 1990.

Uns anos máis tarde, coa finalidade de adaptarme ás necesidades da granxa, decidín crear un establo novo para as vacas lactantes, quedando a antiga construción para a crianza da propia recría.

Así mesmo, cabe sinalar que aínda que os comezos foron como granxa convencional co paso dos anos descubrín que a miña ideoloxía non ía totalmente parella á forma de traballo, razón que me levou no 2008 a iniciar o cambio a ecolóxico coa súa posterior inscrición no CRAEGA.

Dende o 2018 distribúo leite para Casa Grande de Xanceda. Unha granxa familiar, láctea, ecolóxica e galega convencida de que existe unha forma mellor e máis responsable de facer iogures ecolóxicos e produtos lácteos. ¡Unha filosofía estupenda acorde cos meus principios!

A conversión a ecolóxico

A conversión a ecolóxico ven sempre acompañada dun período de adaptación, é dicir, dun tempo para adecuar a granxa a nova normativa. Os principais cambios durante a modificación afectaron ás vacas, aos prados e ao leite e con eles conseguín:

Manter as vacas en pastoreo pois en realidade xa sempre foi o método utilizado.

Ter uns prados libres de produtos e abonos químicos empregando na actualidade como único fertilizante o purín, xerado polas propias vacas na granxa.

Ter un leite máis san, máis natural, cunhas calidades nutritivas máis altas e por enriba, riquísimo.